ଲଙ୍କାରେ ହରିନାମ: ଅମିତ ଶାହଙ୍କୁ ପ୍ରଶଂସା କଲା ଶିବସେନା

0

(ପ୍ରମିତ ପ୍ରମଥେଶ) ରିପୋଟର୍ସ ଟୁଡେ: ଗତ କିଛିଦିନ ହେବ ଏନଡିଏର ହାତ ଛାଡି କଂଗ୍ରେସ ଓ ଏନସିପି ସହ ମିଶି ମହାରାଷ୍ଟ୍ରରେ ମହାମେଣ୍ଟ ସରକାର କରିଥିବା ଶିବସେନା ଏବେ କେନ୍ଦ୍ର ଗୃହମନ୍ତ୍ରୀ ତଥା ବିଜେପି ମୁଖ୍ୟ ଅମିତ ଶାହଙ୍କ ପ୍ରଶଂସା କରୁଥିବା ଖବର ମିଳିଛି। ଶିବସେନାର ରାଜ୍ୟସଭା ସାଂସଦ ତଥା ମୁଖପାତ୍ର ସଞ୍ଜୟ ରାଉତ ଅମିତ ଶାହଙ୍କୁ ପ୍ରଶଂସା କରିଛନ୍ତି। ସେ କହିଛନ୍ତି ଯେ ଜମ୍ମୁ -କଶ୍ମୀରରୁ ୩୭୦ ଧାରା ଉଚ୍ଛେଦ କରିଥିବା ଦେଶର ଶକ୍ତିଶାଳୀ ଗୃହମନ୍ତ୍ରୀ ଚାହିଁଲେ କର୍ଣ୍ଣାଟକ ଓ ମହାରାଷ୍ଟ୍ର ସୀମାରେ ଥିବା ଜମିକୁ ନେଇ ବିବାଦର ସମାଧାନ ହୋଇପାରିବ।

କର୍ଣ୍ଣାଟକର ବେଲଗାଭି ମହାରାଷ୍ଟ୍ରର ବୋଲି ଉଦ୍ଧବ ଠାକରେ ଦାବି କରିଛନ୍ତି। ଏହି ଜିଲ୍ଲାରେ ମରାଠୀ ଭାଷାଭାଷୀଙ୍କ ସଂଖ୍ୟା ଅଧିକ ହୋଇଥିବା ହେତୁ ଏହା ମହାରାଷ୍ଟ୍ରରେ ମଶିବା ଦରକାର ବୋଲି ଠାକରେ କହିଛନ୍ତି। ମହାରାଷ୍ଟ୍ର ସରକାରଙ୍କର ଏହି ନୂତନ ଦାବି ଉଠିବା ପରେ ବେଲଗାଭିରୁ ମହାରାଷ୍ଟ୍ରର କୋହ୍ଲାପୁରକୁ ଚଳାଚଳ କରୁଥିବା ବସକୁ ବନ୍ଦ କରି ଦିଆଯାଇଥିଲା ।

ଏହାକୁ ନେଇ କିଛି ଦିନ ତଳେ କର୍ଣ୍ଣାଟକର ମୁଖ୍ୟମନ୍ତ୍ରୀ ବିଏସ ୟେଦ୍ୟୁରାପ୍ପା ମୁହଁ ଖୋଲିଥିଲେ। କର୍ଣ୍ଣାଟକର ମୁଖ୍ୟମନ୍ତ୍ରୀ ସ୍ପଷ୍ଟଭାବେ କହିଥିଲେ ଯେ, ତାଙ୍କ ସରକାର କାଣିଚି଼ଏ ବି ଜମି ମହାରାଷ୍ଟ୍ରକୁ ଛାଡ଼ିବେ ନାହିଁ । ୟେଦ୍ୟୁରାପ୍ପା  କହିଥିଲେ ଯେ, ମହାରାଷ୍ଟ୍ରର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ରାଜନୈତିକ ଫାଇଦା ଉଠାଇବା ଲାଗି କର୍ଣ୍ଣାଟକର ବେଲଗାଭି ସୀମା ପ୍ରସଙ୍ଗକୁ ଉଠାଇଛନ୍ତି। ଉଦ୍ଧବ ଭ୍ରମ ସୃଷ୍ଟି କରିବାକୁ ଉଦ୍ୟମ କରୁଛନ୍ତି ବୋଲି ଅଭିଯୋଗ କରିଥିଲେ । ଉଦ୍ଧବ ଠାକରେ ମରାଠୀ ଓ କନ୍ନଡ ଭାଷାଭାଷୀଙ୍କ ମଧ୍ୟରେ ଫାଟ ସୃଷ୍ଟି କରିବାକୁ ଉଦ୍ୟମ କରୁଛନ୍ତି ବୋଲି ବି କହିଥିଲେ ବିଏସ ୟେଦ୍ୟୁରାପ୍ପା । ଏହାକୁ ସେ ତୀବ୍ର ନିନ୍ଦା କରିଥିଲେ।