୩ବର୍ଷରେ ସବୁ ପଞ୍ଚାୟତରେ ପକ୍କା ଘର

0

(ମୃତ୍ୟୃଞ୍ଜୟ ଭୋଇ)ଭୁବନେଶ୍ୱର: ରାଜ୍ୟର ସବୁ ପଞ୍ଚାୟତରେ ହେବ ପକ୍କା ଘର। ୩ ବର୍ଷ ମଧ୍ୟରେ ବିଜୁ ପକ୍କା ଘର ଓ ଆବାସ ଯୋଜନାରେ ସବୁ ପଞ୍ଚାୟତରେ ପକ୍କା ଘର ଯୋଗାଇ ଦେବାକୁ ସରକାର ଲକ୍ଷ୍ୟ ରଖିଛନ୍ତି। ଏହି ଲକ୍ଷ୍ୟ ହାସଲ ପାଇଁ ଉଦ୍ୟମ କରାଯାଉଛି ବୋଲି କହିଛନ୍ତି ପଞ୍ଚାୟତରାଜ ମନ୍ତ୍ରୀ ପ୍ରତାପ ଜେନା। ଏ ନେଇ ମାର୍ଚ୍ଚ ୫ତାରିଖରେ ବିଜୁ ଜୟନ୍ତୀ ଓ ପଞ୍ଚାୟତିରାଜ ଦିବସରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏକ ବଡ଼ ଘୋଷଣା କରିପାରନ୍ତି।
ତେବେ ବିଜୁ ପକ୍କା ଘର ଓ ଆବାସ ଯୋଜନାକୁ ନେଇ ଉଭୟ ବିରୋଧୀ ଦଳ ନେତା ଅସନ୍ତୋଷ ପ୍ରକାଶ କରିଛନ୍ତି । ଯାହାର ସଠିକ ତଦାରଖ କରାଯାଉନାହିଁ। ହିତାଧିକାରୀ ଚୟନରେ ଚଞ୍ଚକତା ହେଉଛି। କେବଳ ଦଳୀୟ ଆଧାରରେ ଘର ବଣ୍ଟା ଯାଉଛି। ଏହା କେବଳ ରାଜନୈତିକ ଲାଭ ପାଇଁ। ତାହା ବନ୍ଦ କରନ୍ତୁ। ପ୍ରତି ୧ବର୍ଷରେ ୨୦ଲକ୍ଷ ପରିବର୍ତ୍ତେ ଯଦି ୧୦ ହଜାର ଦେଇପାରନ୍ତେ ତେବେ ଭଲ ହୁଅନ୍ତା ।ଏହା ଏକ ମିଥ୍ୟା ପ୍ରହସନ ଭୋଟ ହାତେଇବାର ଏହା ଏକ ମାଧ୍ୟମ ବୋଲି ବିରୋଧୀ ନିନ୍ଦା କରିଛନ୍ତି।
ତେବେ ମାର୍ଚ୍ଚ ୫ରେ ବିଜୁ ଜୟନ୍ତୀ ଓ ପଞ୍ଚାୟତିରାଜ ଦିବସକୁ ବଡ଼ ଆକାରରେ ପାଳନ କରିବ ବିଜେଡି। ୫ମ ଥର ଲାଗି ରାଜ୍ୟରେ ବିଜେଡି ଶାସନ କ୍ଷମତାକୁ ଆସିଥିବା ବେଳେ ଗତ ୨୦ବର୍ଷ ସରକାରରେ ରହିବା ମଧ୍ୟରେ ଯେଉଁସବୁ ସଫଳ ଜନକଲ୍ୟାଣକାରୀ ଯୋଜନା କରାଯାଇଛି ତା’ର ରାଜ୍ୟବ୍ୟାପୀ ପ୍ରଚାର ମଧ୍ୟ କରାଯିବ। ସମସ୍ତ ୩୩ଟି ସାଂଗଠନିକ ଜିଲ୍ଲାରେ ଜୋରଦାର ଉତ୍ସବ ପାଳନ ପାଇଁ ମନ୍ତ୍ରୀମାନଙ୍କୁ ନିର୍ଦ୍ଦେଶ ଦିଆଯାଇଛି।
ଉଲ୍ଲେଖଯେଗ୍ୟ, ମାର୍ଚ୍ଚ ୫ ତାରିଖରେ ବିଜେଡି ସରକାର ଓଡ଼ିଶାରେ ନିଜର ୨୦ ବର୍ଷର ଶାସନ ପୂରା କରିବ ଏବଂ ବିଜେଡି ଯୁବ ଓ ମହିଳା ସଦସ୍ୟଙ୍କ ସହ ୭ଦିନ ବ୍ୟାପି ଜୟନ୍ତୀ ପାଳନ କରିବ। ଏହା ସହିତ ବିଜେଡି ଦଳ ବ୍ୟତୀତ ଓଡ଼ିଶା ସରକାରଙ୍କ ପକ୍ଷରୁ ମଧ୍ୟ ବିଜୁ ବାବୁଙ୍କ ଜନ୍ମମାଟି କଟକରେ ଏକ ବିରାଟ ସମାରୋହ ଆୟୋଜନ କରାଯିବ। ରାଜ୍ୟରେ ସମସ୍ତ ବ୍ଲକ, ନିର୍ବାଚନ ମଣ୍ଡଳୀରେ ପାଳନ କରାଯିବକୁ ନିଷ୍ପତ୍ତି ନିଆଯାଇଛି। ବିଜୁ ବାବୁଙ୍କ ସାହାସିକତା ଓ ଓଡ଼ିଶା ଗଢିବାରେ ବଳିଦାନର ବାର୍ତ୍ତା ଲୋକଙ୍କ ପାଖରେ ପହଞ୍ଚାଯିବ । ଏହା ସହ ୨୦ ବର୍ଷର ସଫଳତା କଥା ବି ଲୋକଙ୍କ ପାଖକୁ ପହଞ୍ଚାଇବ ଦଳ।