ପ୍ରାକୃତିକ ବିପର୍ଯ୍ୟୟ କ୍ଷେତ୍ରରେ ଓଡ଼ିଶାର ପଦକ୍ଷେପରେ ଓସ୍‌‌ଡମା’ ଦେଶ ପାଇଁ ଆଦର୍ଶ : ମିଳିବ ଆପଦ ପ୍ରବନ୍ଧନ ପୁରସ୍କାର

0

ଭୁବନେଶ୍ୱର: ଓଡିଶା ଏବେ ସବୁଥିରେ ନମ୍ବର ୱାନ ବୋଲି ପରିଚୟ ପାଇ ଆସୁଛି । ସେ ଖେଳ କ୍ଷେତ୍ରରେ ହେଉ କି ମହାମାରୀ କରୋନା ମୁକାବିଲାରେ । ସବୁଥିରେ ଓଡିଶା ବିଶ୍ୱରେ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛି । ମୁଖ୍ୟମନ୍ତ୍ର୍ୀ ନବୀନ ପଟ୍ଟନାୟକଙ୍କ ସୁଶାସନ ପାଇଁ ଆଜି ଓଡିଶା ବିଶ୍ୱ ଦରବାରରେ ସ୍ଥାନ ପାଇଛି । ଏହାସହିତ ଅକ୍ଟୋବର ମାସ ଆସିଲେ କହୁଯାଏ ମହାବାତ୍ୟାର ଜନ୍ମଦିନ ଆସିଲା । କାରଣ ଠିକ ଏହି ସମୟରେ ଓଡିଶାରେ ବାତ୍ୟା ଦେଖାଯାଏ । ଫଳରେ ଭୟରେ ଥାଆନ୍ତି ଜନସାଧାରଣ । କିନ୍ତୁ ପ୍ରାକୃତିକ ବିପର୍ଯ୍ୟୟ ମୁକାବିଲା ସଠିକ ଭାବରେ କରି ଲୋକଙ୍କ ମନରୁ ଭୟ ଦୂର କରିଥାନ୍ତି ରାଜ୍ୟ ସରକାର । ବାତ୍ୟା ଆସିବା ପୂର୍ବରୁ ଲୋକଙ୍କୁ ସଚେତନ କରିବା ସହ ଶୁଖିଲା ଖାଦ୍ୟ ଠାରୁ ଆରମ୍ଭ ଓଡ୍ରାଫ୍ ଟିମ୍, ଅଗ୍ନିଶମ ବାହିନୀକୁ ସତର୍କ କରାଯାଇଥାଏ । ଯେଉଁଥିପାଇଁ ଅନେକ ଧନ ଜୀବନ ନଷ୍ଟ ହେବାରୁ ବଞ୍ଚିଯାଇଥିବାର ବହୁବାର ଦେଖିଛନ୍ତି ଓଡିଶାବାସୀ । ତେବେ ପ୍ରାକୃତିକ ବିପର୍ଯ୍ୟୟ ପରିଚାଳନା ନେଇ ବହୁବାର ପ୍ରଶଂସା ଓଡିଶା ହୋଇସାରିଥିବା ବେଳେ ପରିଚାଳନା ମଡେଲକୁ ପୁଣିଥରେ ଶ୍ରେଷ୍ଠ ସ୍ୱୀକୃତି ଦେଇଛି କେନ୍ଦ୍ର ସରକାର।କେନ୍ଦ୍ର ସରକାରଙ୍କ ପକ୍ଷରୁ ପ୍ରତିବର୍ଷ ଜାନୁଆରୀ ୨୩ ସୁଭାଷ ଚନ୍ଦ୍ର ବୋଷଙ୍କ ଜନ୍ମ ଜୟନ୍ତୀରେ ଏହି ପୁରସ୍କାର ଘୋଷଣା କରାଯାଇ ଆସୁଛି। ଚଳିତ ବର୍ଷ ଓଡ଼ିଶାର ‘ଓସ୍ଡମା’ ଏହି ପୁରସ୍କାର ନିମନ୍ତେ ମନୋନୀତ ହୋଇଛି। ଅନୁରୂପ ଭାବରେ ମିଜୋରାମର ଲୁଙ୍ଗଲେଇ ଦମକଳ କେନ୍ଦ୍ରକୁ ମଧ୍ୟ ପୁରସ୍କାର ପ୍ରଦାନ କରାଯିବା ନେଇ କେନ୍ଦ୍ର ଘୋଷଣା କରିଛି। ପୁରସ୍କାର ବାବଦକୁ ୫୧ ଲକ୍ଷ ଟଙ୍କାର ଅର୍ଥରାଶି ସହିତ ସାର୍ଟିଫିକେଟ୍ ପ୍ରଦାନ କରାଯିବ ବୋଲି ଜଣାପଡ଼ିଛି। ବିପର୍ୟ୍ୟୟ ପରିଚାଳନାରେ ସର୍ବୋତ୍କୃଷ୍ଟ ପଦକ୍ଷେପ ଓ ପାରଦର୍ଶୀ ନୀତି ନିମନ୍ତେ ଓଡ଼ିଶା ସାରା ଦେଶରେ ଶ୍ରେଷ୍ଠ ମାନ୍ୟତା ପାଇଛି। ଏଥିପାଇଁ ଓଡ଼ିଶା ରାଜ୍ୟ ବିପର୍ୟ୍ୟୟ ପରିଚାଳନା କର୍ତ୍ତୃପକ୍ଷ (ଓସ୍ଡମା)କୁ ‘ସୁଭାଷ ଚନ୍ଦ୍ର ବୋଷ ଆପଦ ପ୍ରବନ୍ଧନ ପୁରାସ୍କାର-୨୦୨୩’ ନିମନ୍ତେ କେନ୍ଦ୍ର ସରକାର ମନୋନୀତ କରିଛନ୍ତି। ସୋମବାର ନେତାଜୀ ସୁଭାଷ ଚନ୍ଦ୍ର ବୋଷଙ୍କଜୟନ୍ତୀ ଅବସରରେ ଓଡ଼ିଶାକୁ ଏହି ପୁରସ୍କାର ପ୍ରଦାନ କରାଯିବା ନେଇ କେନ୍ଦ୍ର ସରକାର ଘୋଷଣା କରିଛନ୍ତି। ୧୯୯୯ ମସିହାରେ ସ୍ଥାପନ ହୋଇଥିବା ଓସଡମା ବର୍ତ୍ତମାନ ଓଡ଼ିଶାରେ ବିପର୍ୟ୍ୟୟ ପରିଚାଳନା କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଭୂମିକାରେ ଅବତୀର୍ଣ୍ଣ ହୋଇଛି। ପୂର୍ବରୁ ଅନେକ ସଂସ୍ଥା ‘ଓସ୍ଡମା’ର କାର୍ୟ୍ୟକୁ ପ୍ରଶଂସା କରିଥିବା ବେଳେ କେନ୍ଦ୍ର ସରକାର ଓସଡମାକୁ ଏହି ପୁରସ୍କାର ଘୋଷଣା କରିଛନ୍ତି।
ପ୍ରାକୃତିକ ବିପର୍ୟ୍ୟୟ କ୍ଷେତ୍ରରେ ଓଡ଼ିଶାର ପଦକ୍ଷେପରେ ‘ଓସ୍ଡମା’ ଦେଶ ପାଇଁ ଆଦର୍ଶ ହୋଇଛି। ବନ୍ୟା ବାତ୍ୟା ସମୟରେ ‘ଓସ୍‌‌ଡମା’ ପ୍ରମୁଖ ଭୂମିକା ତୁଲାଉଥିବା ବେଳେ ‘ଓସ୍ଡମା’ର ଓଡ଼ିଶା ଡିଜାଷ୍ଟର ରାପିଡ୍ ଆକ୍ସନ ଫୋର୍ସ (ଓଡ୍ରାଫ) ସର୍ବାଧିକ ଗୁରୁ ଦାୟିତ୍ୱ ତୁଲାଉଛି। ବିପର୍ୟ୍ୟୟ ପୂର୍ବରୁ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରଠାରୁ ଆରମ୍ଭ କରି ବାତ୍ୟା ଓ ବନ୍ୟା ପରବର୍ତ୍ତି ପୁନଃରୁଦ୍ଧାର କାର୍ୟ୍ୟ ମଧ୍ୟ ଏହି ଟିମ୍ ତ୍ୱରିତ ଭାବେ କରିଥାଏ। ଯାହାପାଇଁ ଆନ୍ଧ୍ରପ୍ରଦେଶ, ପଶ୍ଚିମବଙ୍ଗ, ଗୁଜରାଟ ଓ କେରଳ ଭଳି ରାଜ୍ୟ ବିପର୍ୟ୍ୟୟ ସମୟରେ ଓଡ଼ଶାର ଏହି ଟିମ୍ ସହାୟତା ଲୋଡ଼ିଛନ୍ତି। ଓଡ଼ିଶାର ଏହି ଟିମ୍ ଢାଞ୍ଚାରେ କେନ୍ଦ୍ର ସରକାର ମଧ୍ୟ ‘ଏନ୍ଡିଆର୍ଏଫ୍’ ସ୍ଥାପନ କରିଛନ୍ତି। ଓସଡମା ଦ୍ୱାରା ପ୍ରତି ଘରୁ ବିପର୍ୟ୍ୟୟ ଯୋଦ୍ଧା ବାହାର କରିବା ପାଇଁ ରାଜ୍ୟ ସରକାର ଇତିମଧ୍ୟରେ ‘ଆପଦ ମିତ୍ର’ ନାମରେ ଯୋଜନା ଆରମ୍ଭ କରିଛନ୍ତି। ଏହି ଯୋଜନାରେ ଯୁବଗୋଷ୍ଠୀଙ୍କୁ ବିପର୍ୟ୍ୟୟ ପରିଚାଳନାର ସ୍ୱତନ୍ତ୍ର ତାଲିମ ଦିଆଯାଇ ସେମାନଙ୍କୁ ଅଭିଯାନରେ ଯୋଡ଼ାଯାଉଛି। ସେହିପରି ‘ଓସ୍ଡମା’ ପକ୍ଷରୁ ଓଡ୍ରାଫ, ଅଗ୍ନିଶମ ସେବା ୟୁନିଟ୍, ପାନୀୟ ଜଳ ଓ ବିଦ୍ୟୁତ୍ ଯୋଗାଣ ୟୁନିଟ୍ଗୁଡ଼ିକୁ ଅତ୍ୟାଧୁନିକ ଯନ୍ତ୍ରପାତି ଓ ଉପକରଣ ଯୋଗାଇବା ସହ ନିୟମିତ ବ୍ୟବଧାନରେ ସେମାନଙ୍କ ତାଲିମ ମଧ୍ୟ ଦିଆଯାଉଛି। ‘ଓସ୍ଡମା’ ଦ୍ୱାରା ରାଜ୍ୟର ବିଭିନ୍ନ ସ୍ଥାନରେ ୮୭୯ ଟି ବହୁମୁଖୀ ବନ୍ୟା/ବାତ୍ୟା ଆଶ୍ରୟସ୍ଥଳୀ ନିର୍ମାଣ କରାଯାଇଥିବା ବେଳେ ରାଜ୍ୟର ୩୮୧ ଟି ଗ୍ରାମରେ ସୁନାମି ମୁକାବିଲା ପାଇଁ ତାଲିମ ପ୍ରଦାନ କରି ଆସୁଛି।

ଓଡ଼ିଶାକୁ ଏହି ସଫଳତା ମିଳିବା ପରେ ମୁଖ୍ୟମନ୍ତ୍ରୀଙ୍କ କାର୍ୟ୍ୟାଳୟ ସମେତ ଏସ୍ଆରସି ତଥା ‘ଓସ୍ଡମା’ର ପରିଚାଳନା ନିର୍ଦ୍ଦେଶକ ପ୍ରଦୀପ ଜେନା ପ୍ରମୁଖ ‘ଓସ୍ଡମା’କୁ ଶୁଭେଚ୍ଛା ଜଣାଇଛନ୍ତି।