କରୋନା : ୧୨ରୁ ୧୫ବର୍ଷ ପିଲାଙ୍କୁ ଦିଆଯାଇପାରେ ଫାଇଜର ଟିକା

0

ମହାମାରୀ କରୋନା ସମଗ୍ର ବିଶ୍ୱରେ ବିପଦ ସୃଷ୍ଟି କରୁଛି। ଏହି ସମୟରେ ପିଲାମାନେ ମଧ୍ୟ କରୋନା ଭୂତାଣୁ ଦ୍ୱାରା ସଂକ୍ରମଣର ଶିକାର ହେଉଛନ୍ତି। ଆଉ ଏବେ ପିଲାମାନଙ୍କୁ କରୋନା କବଳରୁ ରକ୍ଷା କରିବା ପାଇଁ ପ୍ରଥମ କରୋନା ଟିକାକରଣ ଶୀଘ୍ର ଆରମ୍ଭ କରାଯାଇପାରେ । ଆମେରିକାର ଖାଦ୍ୟ ଏବଂ ଔଷଧ ପ୍ରଶାସନ ୧୨ ରୁ ୧୫ ବର୍ଷ ବୟସର ପିଲାମାନଙ୍କ ପାଇଁ ଫାଇଜର ଟିକା ଅନୁମୋଦନ ଦେବାର ସମ୍ଭାବନା ରହିଛି । ନ୍ୟୁୟର୍କ ଟାଇମ୍ସରେ ପ୍ରକାଶିତ ରିପୋର୍ଟ ଅନୁଯାୟୀ ଫାଇଜର-ବାୟୋନୋଟେକ୍ ଦ୍ୱାରା ଟିକାକୁ ଏବେ କିଛି ପିଲାଙ୍କ ଶରୀରରେ ପରୀକ୍ଷା କରାଯାଉଛି । ଏହାପୂର୍ବରୁ ମାର୍ଚ୍ଚରେ କମ୍ପାନୀ ଦ୍ୱାରା ପରିଚାଳିତ ଏକ ପରୀକ୍ଷଣର ଫଳାଫଳ ଦର୍ଶାଇଥିଲା ଯେ ଫାଇଜର-ବାୟୋନୋଟେକ୍ କରୋନା ଭାଇରସ୍ ଟିକା ବୟସ୍କମାନଙ୍କ ତୁଳନାରେ ଯୁବକ କିଶୋରମାନଙ୍କଠାରେ ଅଧିକ ପ୍ରଭାବଶାଳୀ । ଜର୍ମାନିର ଫାର୍ମାସ୍ୟୁଟିକାଲ୍ କମ୍ପାନୀ ବାୟୋନୋଟେକ୍ କହିଛି ଯେ, ୟୁରୋପରେ ୧୨ ରୁ ୧୫ ବର୍ଷ ବୟସ୍କଙ୍କ ପାଇଁ ଜୁନରେ କରୋନା ଟିକା ଆରମ୍ଭ ହେବ। ଏହା ସହ ଫାଇଜର ଏବଂ ଏହାର ସହଯୋଗୀ ଜର୍ମାନି କମ୍ପାନୀ ବାୟୋନୋଟେକ୍ ଚଳିତ ବର୍ଷ ମାର୍ଚ୍ଚ ଶେଷରେ ଦାବି କରିଛନ୍ତି ଯେ, ଏହାର କୋଭିଡ -୧୯ ଟିକା ୧୨ ବର୍ଷରୁ ଅଧିକ ପିଲାମାନଙ୍କ ପାଇଁ ସମ୍ପୂର୍ଣ୍ଣ ସୁରକ୍ଷିତ ଏବଂ ବୟସ୍କଙ୍କ ପରି କୋରାନା ଭୂତାଣୁ ମହାମାରୀର ପ୍ରଭାବକୁ ରୋକିବା ପାଇଁ ପ୍ରଭାବଶାଳୀ ସାବ୍ୟସ୍ତ ହୋଇଛି ।