ରାଜଧାନୀରେ ପୁଲିସ ପ୍ରୋତ୍ସାହନାରେ ଚାଲିଛି ଧଳା ଜହର କାରବାର

0

ଭୁବନେଶ୍ୱର: ରାଜଧାନୀରେ ଧଳା ଜହର କାରବାର । ଖୁଲମ ଖୁଲା ଚାଲିଛି ଏହି କାରବାର । ପୁଲିସ ସବୁ ଜାଣି ଅଜଣା ଚାଉଳ ଭାତ ଖାଉଛି । ଏପରି ଘଟୁଛି ସହିଦ ନଗର ଥାନା ଅଧୀନରେ । ସହିଦ ନଗର ଥାନା ଅଧିକାରୀଙ୍କ ନାକ ତଳେ, ତାଙ୍କ ଜ୍ଞାତସାରରେ ଧଳା ଜହର କାରବାର ସେକେଣ୍ଡ ପୋଷ୍ଟାଲ କଲୋନୀ ନିକଟରେ ଚାଲିଛି । ପୋଷ୍ଟାଲ କଲୋନୀ ନିକଟରେ ଥିବା ବହୁ ଦୋକାନରେ ଚାଲିଛି ଧଳା ଜହରର କାରବାର । ଏହି କାରବାର ନେଇ ସ୍ଥାନୀୟ ଲୋକଙ୍କଠାରୁ ଆରମ୍ଭ କରି ସ୍ଥାନୀୟ ପୁଲିସ ଜାଣିଛି । ଏହାକୁ ନେଇ ଲୋକଙ୍କ ମଧ୍ୟରେ ଉତ୍ତେଜନା ଦେଖା ଦେଉଥିବା ବେଳେ କିନ୍ତୁ କମିଶନରେଟ ପୁଲିସ ସାଜିଛି ନିରବ ଦ୍ରଷ୍ଟା । ଦକ୍ଷ କମିଶନରେଟ ପୁଲିସର ଦକ୍ଷ ଅଧିକାରୀ ଏହି କଳା ଜହରକାରବାରୀଙ୍କ ନିକଟରେ ଅସହାୟ ହୋଇ ପଡିଥିବା ପରି ମନେ ହେଉଛି ।

ଭିଏସଏସ ନଗରର ସେକେଣ୍ଡ ପୋଷ୍ଟାଲ କଲୋନୀ ନିକଟରେ ଥିବା ଏକାଧିକ ବେପାରୀ ଏହି ଧଳା ଜହରର କାରବାରରେ ସମ୍ପୃକ୍ତ । ସେହି ସବୁ ଦୋକାନ ନିକଟରେ ଦିନରାତି ପ୍ରବଳ ଭିଡ । କିନ୍ତୁ ଏହି ଭିଡ ଆଡକୁ ଯାଉନି ସହିଦ ନଗରର ଥାନା ପୁଲିସର ନଜର । ଅନ୍ୟପଟେ କୋଭିଡ କଟକଣା ନାମରେ ପୁଲିସ ସାଧାରଣ ଜନତାଙ୍କଠାରୁ ଆରମ୍ଭ କରି ଅନ୍ୟାନ୍ୟ ଦୋକାନୀଙ୍କୁ ଜରିମାନା କରିବା ସହ ଦୋକାନ ବନ୍ଦ କରି ଦେଉଛି । ହେଲେ ଧଳା ଜହର ବେପାରୀଙ୍କୁ କୌଣସି ତାଗିଦ ନାହିଁ । ସେମାନେ ବିନ୍ଦାସ ହୋଇ ଚଳାଇଛନ୍ତି ବେପାର । ଏହି ଦୋକାନ ଆଗରେ ସକାଳୁ ରାତି ଅଧ ଯାଏଁ ଭିଡ । ଏଠାରେ ନାଁ ରହୁଛି ସାମାଜିକ ଦୂରତା, ନାଁ ମାସ୍କ ପରିଧାନ କରାଯାଉଛି । ସେହି ରାସ୍ତା ଦେଇ ସହିଦନଗର ପୁଲିସ ଏକାଧିକ ବାର ଯା ଆସ କରୁଥିଲେ ମଧ୍ୟ ସେହି ଦୋକାନକୁ ଦେଖି ନ ଦେଖିବା ପରି ଚାଲିଯାଉଛି ।

କମିଶନରେଟ ପୁଲିସ ରାଜଧାନୀକୁ ଅପରାଧ ଓ ନିଶା କାରବାର ମୁକ୍ତ କରିବାକୁ ନେଇ ବିଭିନ୍ନ ସମୟରେ ନାନା ପଦକ୍ଷେପ ନେଉଛି । ଆରମ୍ଭ ହେଉଛି ବିଭିନ୍ନ ଡ୍ରାଇଭ । କିନ୍ତୁ ଦେଖାଦେଉଛି କି ଅପରାଧ ଅପରାଧ ବାଟରେ ଚାଲିଛି, ହେଲେ ପୁଲିସ ଦେଖି ନ ଦେଖିବା ପରି ଅଭିନୟ କରୁଛି । ଏହାକୁ ଦେଖି ସ୍ଥାନୀୟ ଲୋକେ ଅଭିଯୋଗ କରୁଛନ୍ତି କି ପୁଲିସ ବଟି ନେଇ ଏହି କାରବାରକୁ ପ୍ରୋତ୍ସାହନା ଦେଉଛି । ଯେଉଁଠି ପୁଲିସର ମାସିକ ବଟି ଦେବାରେ ବେପାରୀ ବିଫଳ ହେଉଛନ୍ତି, ସେଠାରେ ପୁଲିସ ସେହି ବେପାରୀଙ୍କୁ ଧରି ନିଜ ପାରିଲା ପଣିଆ ମିଡିଆ ଆଗରେ ଦେଖାଉଛି । ପୁଲିସର ସହଯୋଗରେ ଏହି ବେପାରୀମାନେ ନିର୍ଭୟରେ ସେମାନଙ୍କ ବେପାର ଚଳାଇଛନ୍ତି । ଖାଲି ସେତିକି ନୁହେଁ, ସହିଦ ନଗର ଥାନା ଅଧିକାରୀଙ୍କ ସହଯୋଗ ପାଇବାରୁ ଏହି ନିଶା କାରବାରୀ ସ୍ଥାନୀୟ ଅଞ୍ଚଳରେ ଦାଦାଗିରି ଚଳାଇଛନ୍ତି । ଏମାନଙ୍କୁ କେହି ବିରୋଧ କଲେ ଓଲଟି ଅପରାଧି ସେମାନଙ୍କୁ ଧମକ ଚମକ ଦେବା ସହ ମାରପିଟ କରୁଛନ୍ତି । ତେବେ ସହିଦ ନଗର ଥାନା ପୁଲିସ ନାମରେ ଏହି ଗୋଟିଏ ଅଭିଯୋଗ ନାହିଁ । ପୂର୍ବରୁ ମଧ୍ୟ ଆମେ ସହିଦ ନଗର ଥାନା ପୁଲିସର ବଟି ଆଦାୟ ଓ ପୋଷ୍ଟାଲ କଲୋନୀ ନିକଟରେ ହେଉଥିବା ଧଳା ଜହର କାରବାର ସ୍ଥାନଠାରୁ ମାତ୍ର କିଛି ମିଟର ଦୂରରେ ଦେହ ବ୍ୟବସାୟ ନେଇ ଖବର ପ୍ରକାଶ କରିଛୁ । ପୁଲିସ ଦେହ ବ୍ୟବସାୟୀଙ୍କଠାରୁ ମଧ୍ୟ ଅର୍ଥ ନେଇ ସେଠାରେ ଏହି କାରବାର ଚଳାଇଥିବାକୁ ନେଇ ଲୋକେ ଅଭିଯୋଗ ଆଣିଥିଲେ ମଧ୍ୟ ପୁଲିସ ନିରବ ଦ୍ରଷ୍ଟା ସାଜିଆସିଛି । ଏବେ ଚାଲିଛି ଧଳା ଜହରର ବନ୍ୟା । ଯୁବକ, ବୁଢା ସମସ୍ତେ ନିଶାସକ୍ତ ହେଉଛନ୍ତି । ଏହି ନିଶାକାରବାରକୁ ନେଇ ବିଭିନ୍ନ ସମୟରେ ଦେଖାଦେଉଛି ନାନା ଅଘଟଣ । କିନ୍ତୁ ଏସବୁକୁ ନେଇ ପୁଲିସ କୌଣସି ପଦକ୍ଷେପ ନେଉ ନାହିଁ ।

ଏହାକୁ ନେଇ ସାଧାରଣରେ ପ୍ରଶ୍ନ ଉଠୁଛି, କାହିଁକି ସହିଦ ନଗର ପୁଲିସ ନିରବ ? କିଏ ଏହି ଧଳାଜହର କାରବାର ପଛର ମାଷ୍ଟର ମାଇଣ୍ଡ? କାହା ଭୟରେ ପୁଲିସ ସବୁ ଜାଣି ମଧ୍ୟ ନଜାଣିବାର ଅଭିନୟ କରୁଛି? କଣ ଖାଲି ବଟି ଅର୍ଥରେ ସହିଦ ନଗର ଥାନା ଅଧିକାରୀ ଓ ତାଙ୍କ ଦଳ ବଳଙ୍କ ପକେଟ ଗରମ ହୋଇଯାଉଛି ବୋଲି ନା ଏହି କାରବାର ପଛରେ କୌଣସି ପ୍ରତିପତିଶାଳୀ ବ୍ୟକ୍ତିଙ୍କ ପ୍ରଚ୍ଛନ୍ନ ହାତ ରହିଛି, ଯାହାଙ୍କୁ ଭୟ କରି ଥାନା ଅଧିକାରୀ ଚୁପ ରହିବାକୁ ଶ୍ରେୟ ମଣୁଛନ୍ତି?